هو و بس اللي حبيبي *** ومفيش غيره ع البال
في ميعادي معاه بستنىَ *** وبَحَضْر نفسي كمان
مش محتاجه أنا حاجة *** غير سبحة و سجادة
ياما بَحكّي وياما بَشكّي *** و بقول له و يسمعني
و في سجدة قوام يخطفني *** و ألاقي قلبي معاه
قلبي بيطير ويرفرف *** لمكان أنا مُش عارفاه
حتى من غير ما أتكلم *** هو بيسمعني قوام
و الراحة بتيجي و تخبط *** وتقولي أنا أهو ع الباب
و رسايل ياما بتطمن *** يبعتها في كل مكان
أنا أصلاً مش بتمنى *** و أقعد و كمان أستنى
ده أنا بس يدوبك أفكر *** بلاقي اللي أنا عاوزاه
و حتى لما أنا باستنى *** باستنى و أنا وياه
بالصبر يعلمني *** و ادعي و هو يفهمني
و ألاقيه بيديني *** اكتر م اللي أنا عاوزاه
و ألاقيني بتفنن *** مُش عارفاه أرضيه إزاي
و ادعي واقوله سامحني *** لو يوم قصرت معاك
دي الدنيا معاه جنة *** و حياتي معاه حاجة تانية
هو وبس اللي حبيبي *** ومفيش غيره ع البال
آيه إبراهيم
26-9-2013
No comments:
Post a Comment