الإبتلاء

الإبتلاء … إختبار 

ربنا بيختبر درجة” حسن الظن به ” عندنا 
بيختبر إحنا هنصبر ” صبراً جميلا ” و لا هنصبر و خلاص 
بيختبر مفهوم كلمة ” الحمد لله ” عندنا 
بيختبر ” حسن أدبنا ” معه عز و جل 
بيختبر درجة ” اليقين ” عندنا 
بيختبر درجة ” البصيرة ” عندنا 
بيختبر درجة ” التوكل ” عندنا 
بيختبر درجة ” حب الدنيا ” عندنا 
بيختبر درجة ” الإخلاص ” عندنا 
بيختبر درجة ” الرضا ” عندنا 

الإبتلاء … هدية

كان يقول أحد الشيوخ في تفسير إحدى الحكم العطائية 
” إذا أردت أن تعرف مقامك فأنظر فيما أقامك “ 
إن ربنا لما بيقيم العبد في الإبتلاء فالعبد ساعتها بيكون ” مُعرف ” ربنا عاوز يقربه منه و يعرفه به 

الإبتلاء … معية لله 
الإبتلاء عامل زي المنبه … ربنا بيظبطه على معاد معين علشان :- 
يعرفنا به و يقربنا منه … يخلينا نلجأ إليه …. يؤدبنا و يعلمنا … يعرفنا على الحياه … يعرفنا مدى ضعفنا و فقرنا إليه … ربنا عاوزنا نكلمه و نعبده بالدعاء …. عاوز يبصرنا به … عاوز يعرفنا حجم الدنيا الحقيقي … عاوز يعلمنا نرضى …. عاوز ينور بصيرتنا … عاوزنا نأنس بوجوده عز و جل … إلخ 

الإبتلاء … إرتقاء  
جائز نكون إحنا في مكان مش مناسب و ربنا بعت لنا الإبتلاء ده علشان نشوف المكان المناسب لينا … و ساعتها ربنا هيكون بيهدينا للطريق الصح 
جائز يكون ربنا حطنا في مكان معين و إختار لينا طريق معين و بعت لنا الإبتلاء ده علشان يختبرنا و يشوفنا إحنا قد المكان ده و لا لأ … فلما نأخذ بالأسباب و نفهم العطاء من الإبتلاء و ننجح في الإختبار … ربنا يرفعنا و يرقينا 

الإبتلاء … قوة   
الإبتلاء عامل زي الحدوته .. جوه الحدوته دي في شوية أحداث … الأحداث دي ” هي الخلطة السحرية للقوة ” … الخلطة السحرية دي ربنا بيربي أنفسنا و بيربينا بها و بيعطينا من خلالها القوة … لما بيخلص الإبتلاء بتحس إن قوتك على مواجهة الحياة زادت بنسبة كبيرة 

الإبتلاء … عطاء 
فمتى فتح باب الفهم في الإبتلاء .. عاد الإبتلاء عين العطاء 


آيه إبراهيم 
3-5-2013